Giellanjuolggadusat (samisk)

NRK Sámi sáddagiid váldosámegielat leat davvisámegiella, julevsámegiella ja lullisámegiella. NRK Sápmi galgá sihke nannet ja ovdánahttit dáid gielaid.

1. Njuolggadusat

1.1. Ođassáddagiin ja prográmmaid almmuhettiin galget prográmmafuolaheaddjit ja almmuheaddjit geavahit davvisámegiela, julevsámegiela dahje lullisámegiela girjegiela almmolaš norpmaid. Redaktevrrat sáhttet suovvat spiehkastit dáin njuolggadusain jos vuolábeale njuolggadusat ja háltelinját eai rihkkojuvvo.

1.2. Eará sáddagiin, ođasreportášain, jearahallamiin jna. sáhttet suopmaniid erenoamášvuođat geavahuvvot, muhto dat eai galgga rihkkut vuolábeale njuolggadusaid ja háltelinjáid.

1.3. Vieris gielat galget jorgaluvvot sámegillii.

1.4. Suohkaniid/gielddaid dahje Stáhta kártadoaimmahaga dohkkehan namat
galget geavahuvvot, gč. báikenammalága (Lov om stadnamn). Jos namat eai leat vel dohkkehuvvon, de geavahuvvo árbevirolamos hápmi dassái go čállinvuohki ja hápmi lea mearriduvvon.
Eará gielaid ja maiddái eará sámegielaid báikenamat sojahuvvojit dábálaččat sátnemáddagiid heiveheami haga, gč. Sámedikki giella- ja oahpahusossodaga rávagirjji.
Olbmot namuhuvvojit danin manin dan olbmui soahpá buoremusat.

1.5. NRK Sápmi galgá čuovvut dohkkehuvvon čállinvuohkenjuolggadusaid. Čállinvuogi dáfus čuvvojuvvojit maiddái Sámi giellalávdegotti mearrádusat. Redaktevrrat sáhttet suovvat spiehkastit dás jos šáŋŋer erenoamážit gáibida dan.

2. Háltelinját

2.1. Giella galgá leat čielggas. Lunddolaš deattuheapmi ja njálmmálaš giela cealkkaráhkadusat galget hábmet čielga giela.

2.2. Bargit berrejit čuovvut árbevirolaš sátne- ja sojahanhámiid ja doalahit seamma hámiid miehtá prográmma, reportáša jna.

2.3. Sániid ja dajaldagaid berre ulbmiljoavku dovdat ja áddet.

2.4. Sámegiel sánit ja dajaldagat galget geavahuvvot eanemus lági mielde.

2.5. NRK Sámis galgá gullot ja oidnot sámegiela girjáivuohta, nu ahte sámegiela suopmanvalljodat ja giellavejolašvuođat sihke dikšot, ovddidit ja ođasmahttet sámegiela.

3. Rávvagat

Buorre giella = funktionálagiella. Giela sáhttá bonjadit vaikko guđe láhkai, dat sáhttá leat dovduičuohcci, áššálaš, spiehkasteaddji, suhttadeaddji, gáimmadeaddji, heivvolaš, hilbošan láhkai jna. Mo dal de leaš, dat galgá doaibmat njuovžilit dan ektui masa dat lea jurddašuvvon.

Fuomáš ahte ná sáhtát beaktudit gielat:

• 3.1. Leaktu (hállanleaktu, bisánastimat ja vuoigŋan)
• 3.2. Čielga ja vuogas muitalanvuohki
• 3.3. Cealkkašuokŋa, čuoddjilis ja šearusis jietna
• 3.4. Sátneválljen ja giellagovat
• 3.5. Struktuvra ja komposišuvdna
• 3.6. Rumašgiella (jávohisgiella) ja álššat (energiija)
• 3.7. Stiila ja hápmi
• 3.8. Persovnnalaš- ja lunddolašvuohta.

Dát leat giellareaiddut mat NRK Sámi giela dahket čielggasin, bastilin, hutkálažžan ja mat duddjojit buori giela.

4. Ovddasvástádus

Redaktevrrain lea ovddasvástádus gozihit ahte NRK giella lea dáid njuolggadusaid mielde.

22.08.08